Statute

​

PEMBROKE ATHLETA ATHLETICS & TRIATHLON

STATUTE 

​

​

01.     ISEM

​

Il-Klabb huwa magħruf bl-isem ta’ Pembroke Athleta Athletics & Triathlon. Ma’ dan l-isem, jew parti minnu, jista’ jiġi nkorporat minn żmien għal żmien l-istem ta’ xi sponsor.  
It-tibdil fl-isem tal-Klabb jew l-għaqda tiegħu ma’ xi entità oħra ma jistax isir ħlief bi qbil ta’ żewġ terzi (2/3) tal-membri preżenti f’Laqgħa Ġenerali.

 

02.     INDIRIZZ

​

L-indirizz postali huwa c/o Victor Camilleri, 147, Mirammiti, Triq is-Sgħajtar, Naxxar. L-indirizz uffiċjali tal-Klabb huwa dak tal-post fejn ikollu l-kwartieri tiegħu l-Klabb ta’ Pembroke Athleta Athletics & Triathlon, Triq W. Harding, Pembroke. 
F'każ li l-kumitat tat-tmexxija jiddeċiedi li jbiddel dan l-indirizz, din il-bidla għandha tiġi notifikata lill-awtoritajiet kompetenti.

 

03.     AFFILJAZZJONI

​

i.             Il-Klabb huwa affiljat m’Athletics Malta (A.M), mal-Malta Triathlon Federation (MTF), ma’ Sports Malta mal-Awtorita' għall-Integrita fl-Isports Malti                       (AIMS) mal-Events for Athletics Promotion (EAP), mal-Aquatic Sports Association of Malta (ASA) u mal-Uffiċċju tal-Kummissarju dwar                                             Organizzazzjonijiet Volontarji (OCVO). 

​​​

ii.            Il-Klabb huwa organizzazjoni volontarja, awtonoma u li ma tagħmilx profit kif definit fl-Att dwar Organizzazjonijiet Voluntarji (Kap 492 tal-ligijiet ta                         Malta)

 

04.     GĦANIJIET

​​

i.        Il-Klabb għandu jinkoraġġixxi, iġib 'il quddiem u jiżviluppa l-atletika u t-triathlon u dixxiplini sportivi oħra fil-gżejjer Maltin;

​​

ii.       Jorganizza attivitajiet ta’ natura soċjali u/jew kulturali li permezz tagħhom  jeduka lill-atleti u jibnilhom  karattru sod u dixxiplinat;

​​

iii.      Jorganizza attivitajiet sportivi u jieħu sehem f’attivitajiet oħra organizzati mill-entitajiet li magħhom huwa affiljat il-Klabb, minn klabbs jew minn entitajiet            oħra, sakemm dawn l-attivitajiet ma jkunux organizzati minn partit politiku jew minn korp ta’ natura politika.

​​

iv.       Jipprovdi skemi t’għajnuna u jorganizza seminars jew attivitajiet simili li jkabbar l-interess fil-qasam tal-isports;

​​​

v.        Iħajjar lill-atleti tiegħu biex jieħdu sehem f’kompetizzjonijiet barra minn Malta;

​​​

vi.       Jagħmel dak kollu possibbli biex jintlaħqu l-għanijiet hawn fuq espressi;

​​​

vii.      Jiżgura li l-attivitajiet kollha tal-Klabb isiru b’rispett lejn il-prinċipji t’inklużjoni, ugwaljanza u non-diskriminazzjoni, irrispettivament minn sess, razza,                      reliġjon, nazzjonalità jew diżabilità.

​​

05.     SĦUBIJA

​​​

i.        Is-Sħubija fil-Klabb hija miftuħa għal dawk kollha minn ħames (5) snin 'il fuq, irrispettivament mill-post ta’ residenza tagħhom.

​​

ii.                 a.          Il-ħlas tas-sħubija jagħti d-dritt lill-membru għall-użu tal-faċilitajiet kollha li jipprovdi l-Klabb ta’ Pembroke Athleta Athletics & Triathlon.

                    b.          Il-ħlas li jista' jkun dovut għar-reġistrazzjoni għal kwalunkwe avveniment organizzat minn kwalunkwe entita', inkluzi dawk li magħhom huwa                                   affiljat il-Klabb, ikun responsabbilta' tal-atleta. Il-Klabb jista' jagħżel li jeffettwa  ħlasijiet hu f'isem  l-atleti.

​ ​​

iii.      Il-ħlas tas-sħubija għandu jiġi determinat mill-Kumitat minn żmien għal żmien u għandu jkun validu għal perjodu speċifikat mill-istess kumitat. Il-kumitat            jirriserva d-dritt li minn żmien għal żmien jintroduċi xi ħlasijiet addizzjonali skond iċ-ċirkostanzi. Il-ħlasijiet isiru dejjem bil-quddiem u mhumiex rifondibbli.

  

iv.       Il-Kumitat jista’ jirrifjuta jew jillimita s-sħubija f’każ ta’ kunflitt ċar ta’ lealtà jew t’interess ma’ klabb sportiv ieħor fl-istess oqsma dixxiplinari.  

​​​

v.        Is-sħubija fil-Klabb tintemm meta membru jonqos milli josserva l-obbligi finanjarji tiegħu u/jew jekk jiġi mkeċċi wara proċedura dixxiplinarja skont ir-                  regolamenti tal-Klabb jew ta' xi waħda mill-entitajiet li magħhom huwa affiljat il-Klabb.

vi.       Il-membri li ma jkunux għalqu sittax (16)-il sena fil-jum li fih issir Laqgħa Ġenerali ma jistgħux jivvutaw f’dik il-laqgħa, iżda jistgħu jiġu                                            rrappreżentati minn  wieħed mill-ġenituri jew tuturi tagħhom, li għalhekk ikollu vot wieħed f’dik il-Laqgħa. Dan japplika għal kull Laqgħa. 

​​

vii.      Il-membri li ma jkunux in regola fil-ħlas tas-sħubija meta ssir il-Laqgħa Ġenerali ma jistgħux jivvutaw f’Laqgħa Ġenerali.

​​

viii.     Fil-waqt li l-Klabb jieħu kull miżura raġonevoli biex ħadd mill-membri tiegħu ma jsofri xi dannu jew telf, il-Klabb ma jkunx responsabbli għal xi ħsara,                  serq, telf u/jew nuqqas ta’ ħwejjeġ personali, kif ukoll għal injuries li jsiru qabel, waqt jew wara t-taħriġ jew il-kompetizzjonijiet, u lanqas għal kwistjonijiet            bejn il-membri u/jew il-ġenituri/ tuturi.

​​

ix.       Id-data personali tal-membri tinġabar u tinżamm biss għal skopijiet amministrattivi u sportivi tal-Klabb, u tiġi pproċessata f’konformità mar-Regolament            Ġenerali dwar il-Protezzjoni tad-Data (GDPR) u l-liġijiet Maltin applikabbli.

​​​

06.     TMEXXIJA

​​

i.        Il-Klabb, jitmexxa minn Kumitat magħmul minn President, Viċi-President, Segretarju, Kaxxier, Uffiċjal għar-Relazzjonijiet Pubbliċi, Ufficjal għall-Integrita’,              u minn tliet (3) sa seba’ (7) membri oħra. Il-persuni li jokkupaw dawn il-karigi jingħażlu minn fost dawk eletti fil-Laqgħa Ġenerali Annwali. 

​​​

ii.       Wieħed mill-membri jista’ jkun atleta ta’ sittax (16)-il sena jew aktar li jintagħżel minn sħabu l-atleti, ikun inġieb għall-attenzjoni tal-kumitat tat-tmexxija                ta lanqas ġimgħatejn qabel il-Laqgħa Ġenerali Annwali, u jkun in regola fil-ħlas tas-sħubija.  Tali atleta għandu jiġi elett fil-kumitat awtomatikament                    mingħajr il-ħtieġa ta' votazzjoni.

​​

iii.      Jekk ikun hemm aktar minn atleta wieħed li jiġi nominat minn atleti sħabu, l-atleti bejniethom għandhom jiddiskutu u jiddeċiedu min ser ikun ir-                          rapprezentant tagħhom fuq il-kumitat; f'każ li jibqgħu ma jaslux għal qbil ma jiġi elett ħadd minnhom fuq il-kumitat.

​​

iv.       F'dan il-każ il-massimu ta' persuni li jkunu jistgħu jiġu eletti f'dik l-elezzjoni ikun ta' tnax (12). 

​​​

v.        Il-ħatra tal-membri tal-Kumitat hija għal perjodu ta’ sentejn (2), u dawn jistgħu jiġu eletti mill-ġdid.

​​​​

vi.       Il-President għandu r-responsabbiltà tat-tmexxija tal-Klabb. Huwa jippresjedi kull Laqgħa tal-Kumitat u kull Laqgħa Ġenerali. Jekk ma jkunx jista’                        jagħmel dan, ir-responsabbiltà tat-tmexxija tgħaddi f’idejn il-Viċi-President. F’kull laqgħa tal-Kumitat, il-President għandu dritt jivvota bħall-membri l-                  oħra tal-Kumitat  u għandu wkoll dritt ta’ casting vote f’każ li jkun hemm parita’ fl-għadd tal-voti.

​​​

vii.      Il-President għandu wkoll ir-responsabbiltà għall-amministrazzjoni ġenerali tal-Klabb u għall-korrispondenza kollha relatata. Huwa jħejji l-aġenda tal-                  laqgħat tal-Kumitat u ta’ kull Laqgħa Ġenerali. 

​​​

viii.     Is-Segretarju għandu jżomm minuti uffiċjali ta’ kull laqgħa tal-Kumitat u ta’ kull Laqgħa Ġenerali. Dawn il-minuti  għandhom jinkludu d-data, il-ħin, il-                  post, il-membri preżenti, id-deċiżjonijiet u r-riżultati tal-voti. Il-minuti għandhom jiġu approvati fil-laqgħa ta’ wara. Kull membru għandu d-dritt jara l-                  minuti approvati fuq talba bil-miktub, ħlief għal partijiet li jkunu jikkonċernaw informazzjoni kunfidenzjali jew ta’ natura ta’ konflit t’interess jew personali            ta’ membri oħra. Is-Segretarju  jista’ jiddelega lil xi membru ieħor tal-Kumitat biex jgħinu fix-xogħol tiegħu jew biex jagħmel xi xogħol f’loku.

​​

ix.       Il-Kaxxier għandu jżomm rendikont dettaljat tad-dħul u tal-infieq kollu tal-Klabb u jaġġorna lill-Kumitat dwar il-qagħda finanzjarja tal-Klabb                                  regolarment.  Il-Kaxxier huwa wieħed  mill-firmatarji f’kull ftehim li jsir u li għandu x’jaqsam ma dħul jew infieq ta’ flus u f’kull arranġament ta’ natura                     bankarja li jista’ jkun miftiehem. Kull ħruġ ta’ fondi jew arranġament bankarju għandu jkun iffirmat mill-inqas minn żewġ (2) firmatarji awtorizzati, wieħed            minnhom obbligatorjament ikun il-Kaxxier u l- ieħor il-President jew is-Segretarju. 

​​​

x.        Sa ġimgħa qabel l-Laqgħa Ġenerali Annwali, il-Kaxxier għandu jippreżenta lill-Kumitat rendikont dettaljat, debitament approvat mill-awdituri maħtura              fil-Laqgħa Ġenerali preċedenti, dwar it-tranżazzjonijet finanzjarji kollha li jkunu saru mill-Laqgħa Ġenerali Annwali preċedenti sa dakinhar. Kull membru              għandu dritt jitlob u jingħata kopja ta' tali rendikont.

​​​

xi.       Il-Kaxxier jippresjiedi kull sotto-kumitat li jista’ jinħatar b’konnessjoni diretta mal-finanzi, iżda jista’ jiddelega lil membru ieħor  tal-Kumitat biex jaqdi din            il-funzjoni f’loku.

​​​

xii.      Ħadd ma jservi fil-Kumitat jekk ma jkunx ilu membru tal-Klabb għal mill-inqas tnax (12)-il xahar u/jew ma jkunx għadu għalaq sittax (16) -il sena fil-jum li              fih tkun saret l-aħħar Laqgħa Ġenerali. Ġenitur jew tutur t’atleta li jkun reġistrat mal-Klabb  huwa ukoll eliġibbli li jkun membru tal-Kumitat tat-Tmexxija.

​​​

xiii.     Possibbilment kull persuna li sservi fuq il-Kumitat għandha tkun ta' kondotta nadifa.

​​​

xiv.      Il-Kumitat, regolarment iffurmat, jiltaqa’ jew jikkomunika mill-inqas darba fix-xahar. Jekk xi membru mill-Kumitat elett jonqos milli jagħti raġuni valida                għall-assenza tiegħu lis-Segretarju għal tliet laqgħat konsekuttivi, il-membru jkollu  jirriżenja mill-Kumitat u tiġi applikata r-Regola tal-Istatut – Artiklu                  6(x).  L-ebda laqgħa ma tista’ ssir jekk ma jkunux preżenti għaliha mill-inqas nofs in-numru ta' membri tal-kumitat u wieħed.  

​​

xv.       Kull deċiżjoni li tittieħed mill-Kumitat tista' tigi kkontestata mill-membri tal-Klabb jekk għaxra fil-mija (10%) tal-membri mħallsa jiffirmaw petizzjoni, u li                tkun sottomessa formalment u verifikabbli bil-firem tal-membri sabiex tissejjah Laqgħa Ġenerali Straordinarja u jittieħed vot fuq dik id-deċiżjoni.

​​​

xvi.      F’każ li tinħoloq xi vakanza fil-Kumitat, din timtela mill-persuna li fl-aħħar Laqgħa Ġenerali tkun kisbet l-akbar għadd ta’ voti  wara l-persuni eletti.  F’każ            li żewġ persuni jew aktar jiksbu l-akbar għadd ta’ voti wara l-membri eletti, issir by-election biex jiġi determinat l-ordni tal-preferenza tal-votanti. F'każ li              n-numru ta’ membri tal-Kumitat jinżel taħt il-minimu statutorju u ma  jkunx hemm kandidati li ma jkunux ġew eletti fl-aħħar elezzjoni u l-vakanza ma                    timteliex, il-Kumitat jinnomina persuna  biex isservi fil-Kumitat sa dak iż-żmien li l-Kumitat jibqa’ jiffunzjona. Il-persuna għandha tkun konformi mal-                      provedimenti kollha li jiprovdi dan l-Istatut.

​​​

xvii.     Il-Kumitat għandu jivverifika kull nomina li tista’ tiġi sottomessa minn persuni li jkunu jixtiequ jservu fil-Kumitat. Il-Kumitat  jista’ jiċħad nomina f’każ biss            li din ma tkunx konformi ma’ dak li jipprovdi dan l-Istatut.

​​​

xviii.    Il-Kumitat jista’ jaħtar persuni biex iservu f’sotto-kumitati li jgħinu lill-Kumitat fix-xogħol tiegħu.  Ħatra bħal din tista’ ssir għall-perjodu speċifikat mal-                ħatra jew inkella għal żmien li jintemm fil-jum li fih issir il-Laqgħa Ġenerali Annwali. Minkejja dan, iżda, l-ebda sotto-kumitat ma jkompli jiffunzjona f’każ              li, għal xi raġuni, il-Kumitat jirriżenja.

​​​

xix.      Il-Kumitat għandu s-setgħa jaħtar sottokumitati biex jassistuh fl-oqsma varji li jkun qed jaħdem fuqhom. Il-ħatra tkun jew għal biċċa xogħol speċifika,                jew għal perjodu speċifiku, liema perjodu ma jkunx imur lil hinn mid-data tal-Laqgħa Ġenerali Annwali li jmiss. Kull sottokumitat għandu jkun immexxi                minn membru tal-Kumitat.

​​

07.     KONFLITT TA' INTERESS

​​

i.        Kull membru tal-Kumitat li għandu, jew li jista’ jiġi rikonoxxut b’mod raġonevoli li għandu, konflitt t’interess – b’mod  partikolari rigward affarijiet                          finanzjarji, sponsorizzazzjonijiet, jew transazzjonijiet li jaffettwaw il-Klabb – għandu jiddikjara  immedjatament dan il-konflitt lill-Kumitat.

​​

ii.       Il-membru ma jistax jipparteċipa fid-diskussjoni u fil-proċess tat-teħid tad-deċiżjoni relatata ma’ dik il-materja. 

          F'kaz ta' konflitt t'interess, dak il-membru jista:-

​

                    a.          Jiġi mitlub mill-President biex joħroġ temporanjament mill-laqgħa waqt li l-materja tiġi diskussa u deċiża.

                    b.          Konflitti persistenti, serji, jew mhux iddikjarati jistgħu jitqiesu bħala ksur tad-dmir lejn il-Klabb u jistgħu jirriżultaw f’talba mill-Kumitat għar-                                   riżenja tal-membru/ikkonċernat.

                    c.          Kull membru li ma jkunx iddikjara konflitt t’interess, u li jipparteċipa f’deċiżjonijiet fejn għandu dan il-konflitt, ikun soġġett għal azzjoni                                           dixxiplinarja mill-Kumitat, skont il-proċeduri ta’ governanza tal-Klabb.

                    d.          Din il-klawsola tapplika għal kull membru tal-Kumitat, s-sotto-kumitati, u kull membru li jipparteċipa f’deċiżjonijiet rigward affarijiet                                               finanzjarji, sponsorizzazzjonijiet, jew materji oħra fejn konflitt t’interess jista’ jkollu impatt sostanzjali fuq il-Klabb.

 

08.     FINANZI

 

i.        Il-Klabb iżomm fond jew fondi skont l-esiġenza tal-kaxxier, maqbula mal-Kumitat, li fih jinġabar l-introjtu kollu  li jagħmel il-Klabb.

​​

ii.       Il-fondi u l-assi kollha tal-Klabb għandhom jintużaw biss għall-għanijiet tal-Klabb kif stabbilit f’dan l-Istatut.  

​​

iii.      L-ebda parti mill-fondi jew l-assi tal-Klabb ma jista’ jinħareġ, jintuża jew jinżamm għall-benefiċċju privat ta’ membru, ħlief  bħala ħlas ta’ spejjeż                            ġustifikati  jew allowances approvati mill-Kumitat.

 

09.     BORD TA' DIXXIPLINA U APPELLI

 

i.        Meta jiġi rrappurtat bil-miktub xi nuqqas ta’ xi Membru tal-Klabb jew ikun hemm suspett li xi membru tal-Klabb ikun irrenda ruħu ħati t’imġieba ħazina              jew mhux xierqa, li jinkludu atti ta’ slealta' lejn il-Klabb,  atti ta' natura kriminali inkluża korruzzjoni,nkażijiet ta’ doping, ksur ta’ dan l-Istatut jew ksur tar-              regolamenti ta’ xi waħda mill-entitajiet li magħhom huwa affiljat dan il-Klabb, il-Kumitat tat-Tmexxija għandu jwaqqaf Bord ta’ Dixxiplina ad hoc.  Dan il-            Bord ikun kompost minn mhux inqas minn tliet (3) membri li idealment ikunu indipendenti mill-Klabb, u li jingħatawlhom termini ta’ referenza sabiex                  jaġixxu fuqhom.  

​​

ii.       Il-Kumitat tat-tmexxija ikollu d-dritt jissospendi lill-membru li dwaru jkun sar ir-rapport b’effett immedjat, jekk l-akkuża jew akkużi miġjuba kontra tiegħu              ikunu ta’ gravità li tiġġustifika dan, u dan sa ma tingħata deċiżjoni finali.

​​

iii.      Il-Bord tad-Dixxiplina għandu jiġi maħtur mhux aktar tard minn għaxart (10) ijiem mid-data li r-rapport dwar in-nuqqas jiġi mgħarraf lil-Kumitat.

​​

iv.       Il-membru għandu jiġi infurmat bil-miktub liema hi dik l-imġieba tiegħu li tkun qed tiġi investigata, u huwa għandu jissejjah għal smiegħ tal-każ                          quddiem l-istess Bord mhux inqas minn għaxart (10) ijiem minn meta jkunu ntbagħtulu l-akkużi bil-miktub fil-konfront tiegħu.

​​

v.        Il-membru jkollu dritt ikun assistit minn kwalunkwe persuna tal-fiduċja tiegħu waqt is-smigħ.

​​

vi.       Jekk il-Bord ta’ Dixxiplina isib lill-membru ħati t’imġieba mhux xierqa, huwa jista' jagħti ċanfira, jew jissospendi jew ikeċċi lill-membru, skond il-każ.

​​

vii.      Il-membru għandu d-dritt jappella mid-decizjoni tal-Bord tad-Dixxiplina fi żmien ħmistax (15)-il jum mid-data tad-deċiżjoni billi jibgħat bil-miktub lill-                  Kumitat tat-Tmexxija liema huma l-partijiet tad-deċiżjoni li ma jkunx qabel magħhom u għalxiex. 

​​

viii.     Kull appell għandu ikun akkumpanjat bi ħlas ta’ mija u ħamsin Euro (€150). 

​​​

ix.       Appell għandu jinstema’ quddiem Bord tal-Appell magħmul minn tliet (3) persuni li ma jkun ux servew fuq il-Bord ta' Dixxiplina f’dak il-każ.

​​​

x.        Il-Bordijiet jistgħu jaħtru konsulent jew persuna teknika biex tgħinhom waqt is-smiegħ iżda persuna hekk maħtura ma jkollha l-ebda dritt ta’ vot fid-                    deċiżjoni. Jekk il-ħatra tintalab mill-membru akkużat, u tali talba tintlaqa, huwa jkun dovut iħallas lill-Klabb l-ispejjez relattivi għal tali ħatra.

​​​

xi.       Dment li ma jkunx hemm impediment ġustifikat, id-deċiżjoni tal-Bord tal-Appell għandha tingħata fi żmien tletin (30) jum minn meta jidħol l-appell, u                tkun finali. Dik id-deċiżjoni tkun finali u torbot lill-partijiet, bla ħsara għad-drittijiet legali tal-membru taħt il-liġijiet Maltin.

​​

10.     LAQGĦA ĠENERALI ANNWALI (LĠA)

​

i.        Il-Laqgħa Ġenerali Annwali tal-Klabb ssir f’xi jum bejn l-1 ta’ Settembru u l-31 t’Ottubru ta’ kull sena.

​​​

ii.       L-avviż bil-miktub jintbagħat lill-membri kollha, flimkien mal-aġenda u kwalunkwe proposta t’emenda għall-Istatut jew mozzjoni oħra, għandu jintbagħat            mhux inqas minn erba’ (4) ġimgħat qabel id-data tal-Laqgħa.

​​​

iii.      Kull sentejn il-President jew is-Segretarju jagħmel sejħa għal nominazzjonijiet minn persuni li jkunu lesti jservu fuq il-Kumitat  fis-sentejn ta’ wara. Sejħa              bħal din issir mill-inqas erba’ (4) ġimgħat qabel il-jum li fih tkun ser issir il-Laqgħa Ġenerali. Kull nominazzjoni għandha tkun iffirmata mill-persuna                        nominata, mill-persuna li tkun qiegħda tinnominaha u mill-persuna li tkun qiegħda tissekonda n-nomina. Il-persuna nominata, dik li tinnominaha u dik li              tissekonda n-nomina għandhom ikunu in regola ma' dan l-Istatut. Nomina tkun aċċettata biss jekk tasal għand is-Segretarju ħmistax (15)-il jum qabel id-            data li fiha tkun ser issir il-Laqgħa Ġenerali. Is-Segretarju jgħarraf lill-membri bl-ismijiet tal-persuni kollha li għalihom ikun irċieva nomina valida  sa mhux            aktar tard minn ġimgħa qabel id-data tal-Laqgħa Ġenerali Annwali. Il-lista tal-kontestanti tkun ikkomunikata lill-membri f’ordni alfabetiku.

​​

iv.       Il-membri kollha tal-Klabb jistgħu jressqu mozzjonijiet għal tibdil fl-Istatut jew għal affarijiet oħra. Dawn għandhom jintbagħtu sal-aħħar ta’ Lulju u jkunu            ffirmati minn mill-inqas żewġ (2) membri in regola ta’ dan l-Istatut. Il-membri tal-Kumitat jistgħu wkoll jipproponu mozzjonijiet, bil-kundizzjoni li jkunu                  approvati mill-Kumitat mhux inqas minn ħmistax (15)-il jum qabel il-Laqgħa. Kull mozzjoni tinġieb għall-attenzjoni tal-membri kollha sa mhux aktar tard              minn għaxart (10) ijiem qabel id-data li fiha tkun ser issir il-Laqgħa Ġenerali.

​​​

v.        Kull tibdil fl-Istatut irid ikun approvat minn żewġ terzi (2/3) tal-membri preżenti u bid-dritt tal-vot.

​​​

vi.       Il-Laqgħa Ġenerali ma tibdiex jekk ma jkunux preżenti għaliha mill-inqas għaxra fil-mija (10%) tal-membri tal- Klabb. F’każ li l-persuni preżenti fil-ħin                    stabbilit għall-bidu tal-Laqgħa Ġenerali jkunu anqas minn daqshekk, il-Laqgħa Ġenerali tibda bil- membri preżenti nofs siegħa wara l-ħin stabbilit għall-            bidu tal-Laqgħa.

​​​

vii.      L-aġenda tal-Laqgħa Ġenerali Annwali għandha tinkludi:

​​​

                    a)          Indirizz mill-President,

                    b)          Rendikont amministrattiv mis-Segretarju,

                    c)          Rendikont finanzjarju mill-Kaxxier,

                    d)          Mozzjonijiet u emendi għall-Istatut.

                    e)          Ħatra ta’ kummissjoni elettorali biex tmexxi l-elezzjoni għall-membri tal-Kumitat, fuq bazi biennali,

                    f)            Elezzjoni tal-membri tal-Kumitat il-ġdid fuq bażi biennali ukoll, 

                    g)          Ħatra t’Awdituri indipendenti.

viii.     L-elezzjoni għandha ssir b’votazzjoni sigrieta. Jekk in-nominazzjonijiet ikunu eżatt jew daqs il-postijiet battala, il-kandidati jiġu meqjusa eletti                                awtomatikament.

​​​

ix.      F’każ ta’ forza maġġuri jew emerġenza pubblika li ma tippermettix laqgħa fiżika, il-Laqgħa Ġenerali tista’ ssir online permezz ta’ pjattaformi diġitali                      sikuri,  bil-kundizzjoni li l-identità tal-votanti tkun ivverifikata u l- votazzjoni ssir b’mod sigriet u trasparenti. 

​​​

x.        Il-persuni eletti fil-Laqgħa Ġenerali Annwali jiltaqgħu sa mhux aktar tard minn ġimgħa mil-Laqgħa Ġenerali biex jitqassmu l-karigi għas-sentejn ta’ wara.

​​​

xi.       Id-dritt tal-vot huwa personali u ma jistax jiġi trasferit lil ħaddieħor, ħlief fil-każ ta’ minorenni kif provdut f’Artiklu 5 (vii).

​​​

xii.      Sakemm ma jkun hemm xejn kuntrarju għall-provvedimenti ta’ dan l- Istatut, kwalunkwe nuqqas ta’ qbil li jista’ jqum f’Laqgħa Ġenerali jiġi deċiż                          b’maġġoranza sempliċi ta’ voti tal-membri preżenti.

​

11.      LAQGĦAT ĠENERALI STRAORDINARJI (LĠS)

​​​

i.        Il-Kumitat jista’ jsejjaħ Laqgħa Ġenerali Straordinarja fi kwalunkwe żmien tal-ħatra tiegħu għal kull raġuni li l-Kumitat iqis ġustifikata.

​

ii.       Salv dak provdut fil-klawsola  6.ix.  ta’ dan l-Istatut, il-Kumitat għandu isejjaħ Laqgħa Ġenerali Straordinarja ukoll jekk jintalab jagħmel hekk bil-miktub                minn kwart (1/4) jew aktar tal-membri msieħba, skond il-lista tal-membri imħallsa aġġornata sa dakinhar.  Talba bħal din għandha tkun akkumpanjata                  minn spjegazzjoni li, fil-ħsieb ta’ min iressaq it-talba, tkun tiġġustifika l-laqgħa. 

​

iii.      Il-Laqgħa Ġenerali Straordinarja għandha tinżamm fi żmien mhux aktar tard minn erbgħin (40) jum mid-data tat- talba bil-miktub. 

​

iv.       L-avviż tal-Laqgħa, flimkien mal-aġenda u s-suġġetti li għandhom jiġu diskussi, għandu jintbagħat lill-membri kollha mill-inqas ġimagħtejn (14-il jum)                  qabel id-data tal-Laqgħa.

​

v.        F’Laqgħa Ġenerali Straordinarja jistgħu jiġu diskussi biss is-suġġetti indikati fl-avviż.

​

vi.       Il-votazzjoni f’Laqgħa Ġenerali Straordinarja għandha ssir fuq l-istess linji u regoli kif provdut għall-Laqgħa Ġenerali Annwali, inkluża l-proċedura tal-vot            sigriet fejn ikun meħtieġ.

​

vii.      F’każ ta’ forza maġġuri jew emerġenza pubblika li ma tippermettix laqgħa fiżika, il-Laqgħa Ġenerali Straordinarja tista’ ssir online permezz ta’                              pjattaformi diġitali sikuri, bil-kundizzjoni li l-identità tal-membri tkun ivverifikata u l-votazzjoni ssir b’mod sigriet u trasparenti.

​​

12.     XOLJIMENT TAL-CLUB

​​

i.        Il-Klabb jista’ jiġi xolt biss permezz ta’ deċiżjoni ta’ żewġ terzi (2/3) tal-membri preżenti u b’dritt ta’ vot f’Laqgħa Ġenerali Straordinarja msejħa apposta              għal dan l-għan, jew fi kwalunkwe każ fejn il-membri tal-Klabb ikunu inqas minn għoxrin (20) għal aktar minn sena. 

​​

ii.       F’każ ta’ xoljiment, l-assi kollha tal-Klabb, inklużi flus, proprjetà, tagħmir u kwalunkwe patrimonju ieħor, għandhom jgħaddu f’idejn dik l-assoċjazzjoni                  nazzjonali tal-atletika li jkollha l-obbligu li tħarishom u tużahom esklussivament għal skopijiet sportivi u volontarji.

iii.      L-ebda membru individwali tal-Klabb jew tal-Kumitat m’għandu jkollu dritt jirċievi sehem mill-assi jew mill-fondi tal-Klabb fi kwalunkwe ċirkustanza.

​​

13.     DISPOŻIZZJONIJIET ĠENERALI

​

i.        Responsabbiltà Ċivili Limitata :-

 
          L-ebda membru tal-Klabb, inkluż il-membri tal-Kumitat, m’għandu jkun personalment responsabbli għal xi obbligu finanzjarju jew legali tal-Klabb. Ir-                  responsabbiltà tal-membri hija limitata għall-ammont ta’ ħlasijiet tas-sħubija jew kontribuzzjonijiet li jkunu dovuti skont dan l-Istatut.   

​

ii.       Regoli ta’ Interpretazzjoni :-  

          Kull referenza f’dan l-Istatut għall-maskil għandha titqies li tinkludi wkoll il-femminil, u kull referenza għal “membru” għandha tinkludi wkoll                                  membri ta’ kull età, ħlief fejn b’mod ċar ikun speċifikat mod ieħor.

​​

​​

​​